Sosialy

Malagasy ao La Réunion Hajao ny zon’ny Malagasy tompon-tany

Sosialy
Talata 22 Oktobra 2019

Miitatra hatrany ampitan-dranomasina ny raharaha Ambohitrimanjakana amin’izao.

Miray feo sy tsy mankasitraka ny amboletra hanesorana ny olona amin’ny taniny ihany koa ny teratany Malagasy atsy amin’ny Nosy La Réunion. « Atsaharo tsy misy hatak'andro ny fanotofana tany ! Atsaharo ny asa fanombohana sy ny fananganana ny Tana-masoandro eo Ambohitrimajaka ! Atsaharo ny fandatsahan-dra ny vahoaka sy ny fampiharana ny herisetra ! Aza esorina amin'ny tanindrazany ny mponina ao Ambohitrimanjaka. Aza atao sesitany ny mpiray Tanindrazana satria tsy nisy heloka vitany. Midadasika i Madagasikara ka maro ny toeran-kafa tsy misy mponina, azo hanorenana Tana-masoandro », hoy ny fanehoan-kevitr’izy ireo nandritra ny fihaonana fanohanana ny tolon'ny Vahoakan'Ambohitrimanjaka, notontosaina ny alahady 20 oktobra 2019 teo. Manomboka malaza eo amin’ny vaovao iraisam-pirenena ihany koa io raharaha io ankehitriny ary manara-maso akaiky ny mpiaro ny zon’olombelona eo anatrehan’ny mety ho fanaovana an-terisetra manohintohina ny zo maha olona.

Toky R