Sosialy

Maka Alphonse - Filohan’ny CFM “Tena misy ny olona matin’ny kere”

Sosialy
Alarobia 06 Janoary 2021

“Mahatratra 39˚C hatrany amin’ny 40˚C ny hafanana, ary eo ihany koa ny tsiomena

na rivotra mifofo tsy hifankahitana any Atsimo. Mitohy sy miha mahazo ny kere. Tsy manan-kohanina ny olona, ny biby fiompy atao vary boba ka raha mivarotra omby vositra iray dia zara raha mahazo”, hoy ny Filohan’ny CFM na ny Komitin’ny Fampihavanana Malagasy Atoa Maka Alphonse omaly. Nanambara moa io rafitra io, fa mijery sy manao fanadihadiana ny zava-misy any Atsimo. “Misy ny tonga any Menabe, Faritra Mahajanga, Diego. Misy ny tsy manam-bola intsony ka mandeha tongotra miaraka amin’ny fianakaviana, fa ao ihany koa ny maty an-dàlana, fa tsy mbola anananay ny antontan’isa feno. Efa voa mafy izy avy any, ka vao mahazo hanina kely dia vao mainka mitera-doza”, hoy hatrany Atoa Maka Alphonse.. Nanao antso avo amin’ny hanampiana ho an’ireo izay afaka manao izany tsy ankanavaka moa ny CFM eo anatrehan’ny zava-miseho any Atsimo.

Toky R