Sosialy

Maitre FRAM Amboasary Sud Lasa mivaro-drano hividanan-kanina

Sosialy
Alakamisy 20 Aogositra 2020

Misedra ny mafy ireo mpampianatra FRAM ao amin’ny fari-piadidiam-pampianarana Amboasary Atsimo.

An-jatony izy ireo no tsy nomena tambinkarama efa mananika ny 12 volana izao, araka ny fitarainan’izy ireo. 110.000 Ariary isan’olona isam-bolana, izany hoe antsasaky ny karama farany ambany eto Madagasikara araka ny noferan’ny fanjakana, ary raisina isan-droa volana io tambinkarama io. Ny volana jolay sy aogositra 2019 no noraisin’izy ireo farany. Tsy hita hantenaina nefa koa tsy very hafoy ny tambinkarama, izahay anefa terena amin’ny asa fampianarana, hiatrehana ny fanadinam-panjakana, ampanaovina « jury », hamitana ny taom-pianarana, hoy ny tarainan’ireo mpampianatra FRAM. Mampiana-janaka sy manofa trano anefa izy ireo. Voatery manao vadin’asa mivaro-drano amin’ny « bidon jaune », misy miasa mitrandraka « mica » na manjarano aman’olona ireo mpampianatra FRAM any Amboasary Atsimo mpampianatra FRAM mba hahazoana vola kely hihinanan-kanina. Ny « Vatsy Tsinjo » moa tsy tonga any, ka anaovan’izy ireo antso avo amin’ny mpitondra fanjakana hamaha ny olana, ny fanadinam-panjakana rahateo efa ho avy.

Jean D.