Sosialy

Latsakemboka sy hetra samihafa Naato ny fandoavana azy ireo

Sosialy
Talata 21 Aprily 2020

Nivory niaraka tamin’ny birao maharitra eo anivon` ny Antenimierandoholona ny Praiminisitra Ntsay Christian noho ny ady amin` ny COVID-19.

Fotoana izay nihainoana ireo parlemantera. Mba hahafahana manohana ny toekarantsika sy ireo sehatra tsy miankina, nangataka ny hanaovana ahamehana ireo vokatra anatiny eto akin`ny firenena. “Tsaratsara kokoa raha omena tombony manokana ny famokarana sy fanaparitahana ireo vokatra anatiny toy ny vary, legioma, voankazo toy izay ny vokatra avy any ivelany indray no omen-danja” hoy Rivo Rakotovao, filohan` ny Antenimierandoholona. Mba hahafahana manatanteraka izany dia hamoraina ny fitaterana ireo vokatra manerana ny nosy sy ny fanatsarana ireo lalana amin` ireo toerana sarotra ifamezivezena. Ao anatin` izay fanarenana ara-toekarena izay hatrany, notsipihany ny governemanta tamin` ny alalan` ny praiministra Ntsay Christian sy ny ministry ny vola, Richard Randriamandranto, fa naato ny fandoavana ireo latsakemboka (CNaPS sy OSTIE), ary ireo tataon-ketra sy hetra ary ireo saram-pampiofanana samihafa. Izany dia natao hanohanana ireo sehatra tsy miankina sy mba hahafahana misoroka ireo izay mety hiteraka voka-dratsy eo anivon` ny kitapom-bolan` ireo orinasa Malagasy.

Marigny A.