Sosialy

Lalao Ravalomanana Nizara vatsim-panahy sy vatsin’aina

Sosialy
Alarobia 27 Jona 2018

Noho ny asaramanitra, dia nisy ny vondrom-bavaka izay efa fanao tarihan’ny Ben’ny Tanàna Lalao Ravalomanana, izay niraisan’ny Boriborintany 6 eto Antananarivo Renivohitra.

Tontosa ny alatsinainy tolankandro tetsy amin’ny Tranompokonolona Isotry izany, ka nahitana olona manodidina ny 700 isa . Ny antony dia mba ho fitazaina ara-panahy an’ireo olona ary koa fotoam-bavaka ho an’ny firenena sy ny Kaominina Antananarivo Renivohitra. Nisy ny firariantsoa nataon’ny Ben’ny tanàna Lalao Ravalomanana ho an’ny olona rehetra noho ny fetim-pirenena, narahina fizarana baiboly sy vary 5 kilao avy isaky ny olona mba ho mariky ny fiaraha-mifety. Mbola hitohy hatrany ny fampianarana ara-panahy eny amin’ny Boriborintany, hoy ny ben’ny tanàna Lalao Ravalomanana. Misaotra an’Andriamanitra satria na roa volana tsy nifankahita aza dia tena feo avy aminareo ny hoe noana ny fanahinay, mangatsiaka ny fanahinay, hoy ny ben’ny tanàna Lalao Ravalomanana, izay tsy vatsim-panahy ihany no nentiny fa nisy ihany koa ny vatsin’aina.

Toky R