Sosialy

Lalao Ravalomanana Nampitambatra mpivady miisa 45

Sosialy
Zoma 07 Desambra 2018

Nahazo tombony manokana omaly ireo mpivady 45 isa satria dia ny ben’ny tanànan’Antananarivo Renivohitra,

Lalao Ravalomanana, mihitsy no tonga nampitambatra azy ireo tamin’ny alalan’ny Fisoratam-panambadiana faobe tao amin’ny Lapan’ny tanàna Analakely. Araka ny nambaran’ny ben’ny tanàna dia anisan’ny fitaizana ny vahoaka mba hanana tokantrano vanona sy modely ho reharehan’ny fianakaviana ny fisoratam-panambadiana, ka fifaliana ho azy no nanatanteraka izany omaly. Betsaka ihany koa, hoy izy, ny mpivady tsy vita soratra eto an-drenivohitra ka izay indrindra no nahatonga ny kaominina hikarakara ny hetsika fisoratam-panambadiana maimaimpoana toy izao, nohamoraina tanteraka ny nahafahan’izy ireo nisora-panambadiana. 17 taona no zandriny indrindra tamin’ity fisoratam-panambadiana ity ary 57 taona kosa no zokiny indrindra. Taorian’ny fisoratana dia afaka naka sary niaraka tamin’ny ben’ny tanàna avokoa izy ireo ary samy nahazo fanomezana. Fokontany miisa 10 avy ao amin’ny boriborintany voalohany ireto nahazo tombony ireto ary hezahana hahazo tombontsoa torak’izany ihany koa ireo avy eny anivon’ny Boriborintany 5 hafa eto an-drenivohitra, hoy hatrany ny fanazavana.

J. Mirija