Sosialy

Lakandranon’i Mozambika Mety hisy rivodoza hiforona indray

Sosialy
Alarobia 15 Janoary 2020

Ny tsioka avy avaratra na avaratra andrefana no hamaritra ny andro eto Madagasikara ary arahina fandalovana andian-drahona izany amin’ny faritra Atsimo amin’ny fiafaran’ny herinandro,

araka ny vinavinan’ny Sampandraharaha mpamantatra ny toetr’andro. Tombana mandritra ny herinandron’ny 14-19 janoary io. Hahazo vahana, araka izany, ny oram-baratra arahina tafiotra ny tolakandro, ny hariva ary ny alina manerana ny Nosy ary amin’ny vao maraina ho an’ireo morontsiraka andrefana. Hatevina kokoa izany any amin’ny tapany Atsimo amin’ny faran’ny herinandro. Tsy hisy aloha ny tranga mahery vaika ahiana hiseho. Saingy, ireo oram-baratra no mety harahina tafio-drivotra amin’ny ankapobeny. Etsy andanin’izany, mety hisy ny fiforonan’ny rivodoza ao amin’ny Lakandranon’i Mozambika amin’ny faran’ny herinandro ary arahi-maso akaiky ny fivoaran’izany amin’ny tapan’ny faharoa an’ity herinandro ity, hoy ny fampitam-baovao. Hahitana fidinana ny maripana ambony sy ambany amin’ny faritra Atsimo ; manodidina ny [16 - 25°C] ny maripana ambany ary eo anelanelan’ny [25 - 35°C] ny ambony.

Toky R