Sosialy

La Réunion kely Olona iray matin’ny hatsiaka

Sosialy
Alatsinainy 15 Jolay 2019

Efa tafiditra tanteraka ao anatin’ny vanim-potoanan’ny ririnina isika ankehitriny. Mamirifiry aoka izany ny hatsiaka, indrindra fa ny amin’ny alina. Ramatoa lehibe iray no namoy ny ainy vokatr’izany tetsy La Réunion kely.

Raha araka ny loharanom-baovao dia nipetraka tamin’ireo trano lay nametrahana ireo olona tsy tafiditra tao anatin’ireo kaontenera avy amin’ny Ministeran’ny mponina sy ny fitondram-panjakana farany teo izy io. Niampy ny loto sy ny fofona eny an-toerana izany hatsiaka izany ka tsy tana intsony ny ain’ity Ramatoabe ity. Nomarihin’ireo mponina moa fa raha tapa-bolana taorian’ny nahatongavan’ireo kaontenera maromaro eny an-toerana no fe-potoana nomen’ny tompon’andraikitra fa hahatongavan’ireo kaontenera andiany manaraka dia tsy hita intsony izany mandraka ankehitriny. Efa-bolana izay no lasa hoy izy ireo miaina anaty loto sy hatsiaka tanteraka ny mponina ao La Réunion kely koa manao antso avo amin’ny fitondram-panjakana. Mangataka ireto farany tsy hiangatra koa izy ireo fa hampitovy zo ny tokantrano tsirairay avy. Ankoatra ny trano moa dia olan’izy ireo hafa ny tsy fisian’ny trano fidiovana sy fivoahana.

Pati