Sosialy

Kilalaon’ny ankizy any ivelany Efa misy tonga eto amintsika ireo karazany avo lenta

Sosialy
Sabotsy 01 Desambra 2018

Tsy ho latsa-danja amin’ny any ivelany intsony isika eto Madagasikara raha ny resaka kilalao ho an’ny ankizy no jerena. Nanokatra toeram-pilalaovana goavana, indrindra eto Madagasikara mantsy ny Centre commercial Akoor digue eny Andohatapenaka.

Nampitondraina ny anarana Milalao izy io, natao ho an’ny fianakaviana, ny mpifankatia ary ny mpinamana mba hialana voly, indrindra amin’izao ankatoky ny fety izao. Ny zoma 07 desambra ho avy izao no hosokafana amim-pomba ofisialy izany. Manomboka amin’ny 2.000 Ar ka hatramin’ny 20.000 Ar ny fandraisana anjara. Amin’ny alalan’ny karatra no hahafahana mandray anjara amin’ny kilalao ary iny hatrany no hampiasaina rehefa mandalo eny an-toerana. Afaka milalao ihany koa ny olon-dehibe, satria dia karazan-dalao miisa 25 no ho hita eny an-toerana. Misy ihany koa ireo natokana ho an’ny ankizikely toy ireo any anaty efitrano. Nambaran’ny tompon’andraikitra fa tsy misy atahorana handratra ireto kilalao ireto satria dia mahafehy ny fenitra iraisam-pirenena avokoa.

Pati