Sosialy

Kere any atsimo Miantso firaisankinam-pirenena ny CFM

Sosialy
Talata 03 Novambra 2020

Manoloana ny fahoriana vokatry ny haintany any atsimo dia nanao antsoavo ho amin’ny firaisankinam-pirenena tetsy amin’ny foibeny etsy Ampefiloha omaly ny avy eo anivon’ny filankevitry ny fampihavanana Malagasy (CFM).

Amin’ny alalan’ny fanampiana sy fanomezana samihafa ho enti-miatrika ny zava-misy ilain’ny mpiray tanindrazana amintsika any an-toerana, hoy izy ireo, no hanehoana izany. Tsy misy ny fampihavanana raha tsy misy ny firaisankina satria voin-kava mahatratra ary trano atsimo sy avaratra ka izay tsy mahalena hialofana. Mafy dia mafy, hoy ny CFM, ny manjo ireo havantsika ireo, mijaly ary mamoy aina mihitsy aza. Misaotra ireo rehetra tsara sitrapo efa namaly ary mbola hamaly izao antso izao ny CFM. Ny BNGRC sy ny rantsa-mangaikany, mifampitantana amin’ny mpitondra sy ireo vondrom-paritra itsinjaram-pahefana, no rafitra afaka hanao ny fitondrana sy ny fitsinjarana ara-drariny ny fanomezana rehetra, hoy hatrany ny CFM. Misaotra ary mankahery ny hatrany ny mpitondra mba tsy hikely soroka ka hanohy ny hikaroka vahaolana maharitra amin’izao hanoanana lavareny izao. Alao hery ry mpiray tanindrazana! Hamafiso ny firaisankinam-pirenena! Handeha hanampy ireo havantsika ao atsimo tsy ho faty noana ka mbola hananan’izy ireo hoavy feno fanantenana indray, hoy hatrany ity rafitra ity.

J. Mirija