KAOMININA FIOMBONANA

Tafajoro ny fikambanam-behivavy hanampy ireo sahirana

Sosialy
Alakamisy 07 Aogositra 2025

Betsaka ireo Reny miady irery amin'ny fiainana ankehitriny. Ankoatra ireo maty vady

dia maro tsy tambo isaina ireo nariana na nilaozan'ny Rain-janany....nefa mamelon-janaka. Ho azy ireny indrindra no antom-pijoroan'ny fikambanam-behivavy Andry Fototra Fiombonana ao anatin'ny Kaominina ambanivohitra Fiombonana, distrikan'Atsimondrano. Raha araka ny fanazavan'ny Ben'ny tanana Randriamanantena Gabriel dia miisa 17 ireo mpikambana ankehitriny izay hovatsiana karazam-pitaovana toy ny milina fanjairana sy ny fanaovam-bolo. Ny solombavambahoaka voafidy eny Atsimondrano no hanampy azy ireo amin'izany amin'ny alalan'ny CIAD arahin'ny fanomezana fiofanana. Tanjon'ny kaominina sy ny mpiara-miombon'antoka aminy ny hahatonga ireny karazam-behivavy ireny hanana ny fidiram-bolany manokana tsy ho vesatra ho an'ireo manodidina azy intsony. Tsiahivina moa fa tena manao ho laharam-pahamehana ny sosialin'ireo mponina ao aminy ny Kaominina Fiombonana. Mandeha hatrany ohatra ny fanaovana operation kopia faobe isan-taona hanalana fahasahiranana ny Ray aman-dReny. Zazalahy kely miisa 300 ihany koa no noforaina maimaim-poana ny 13 Jona lasa teo izay hitohy amin'ny fanaovana mariazy faobe ho ana mpivady miisa 30 ny datin'ny 14 Aogositra ho avy izao.
Pati
Légende : Randriamanantena Gabriel, Ben'ny tananan'ny Kaominina Fiombonana Atsimondrano.