Sosialy

Kaominina Antananarivo Renivohitra Mitaiza ny mponina amin'ny fanadiovana

Sosialy
Alakamisy 30 Aogositra 2018

Niara-nanatanteraka fanadiovana faobe, omaly, ny mpiasan'ny Kaominina Antananarivo Renivohitra rehetra notarihin’ny Lefitry ny Ben'ny tanàna Emilien Ramboasalama sy ny Delegen'ny boriborintany fahefatra Ramahandrimanana Solofoniaina Daniel,

izay notontosaina tetsy amin'ny Boriborintany fahefatra, nanomboka teo amin'ny Lapan’ny Antenimierandoholona Anosy hatreny Anosizato Atsinanana, araka lamin'asa napetraky ny Ben'ny tanàna Lalao Ravalomanana. Nisy ny fanalana ireo fako miparitaka, fisokirana ny lakandrano tsentsina rehetra, ny fanalana ireo 4Mi izay miteraka loto sy aretina ary fanasana ireo toerany ary ny fandrarahana fanafody. Eo koa ny fanentanana ireo vahoaka mba hahalala hanadio fa tsy hiandry foana ny kaominina, ny fandaminana ny mpivarotra ary ny fandrindrana ny fiantsonan'ny fiara. Ny tanjona amin'izao hetsika izao dia fitaizana ireo vahoaka amin'ny fanadiovana sy ny fanentanana mba tsy handoto ary manome modely azy ireo. Hitohy manerana ny Boriborintany eto an-drenivohitra izao hetsika izao.

Jean D.