Sosialy

Kaominina Ampitatafika Vonona amin’ny fiatrehana ny fotoam-pahavaratra

Sosialy
Alakamisy 18 Oktobra 2018

Vonona amin’ny fiatrehana ny fotoam-pahavaratra ny kaominina Ampitatafika. Efa nisy ny fanadiovana ny tata-drano rehetra eny an-toerana, hoy ny Ben’ny tanàna Rado Ramparaoelina,

asa izay mbola hitohy hatrany. Ampy tsara ny fitaovana hampiasaina, hoy izy ary tsy nanana olana mihitsy ny mponina nandritra ny fiavian’ny ranon’orana ny fiandohan’ny herinandro teo. Mikasika ny fandriampahalemana indray dia nambarany fa tafakatra folo mianadahy ireo olona mpangalatra scooter teny an-toerana ary efa nampidirina eny amin’ny fonjaben’Antanimora avokoa. Tanora latsaky ny 23 taona avokoa ny ankamaroan’izy ireo, tarihin-dRalava sy Ramainty filoha mpitarika azy ireo. Tafiditra ao anatin’ireo koa ny mpandray ireo môtô “scooter” halatra. Na izany aza anefa dia mbola mitebiteby ihany ny kaominina Ampitatafika ankehitriny. Raha araka ny feo mandeha eny amin’ny manodidina dia hamoaka azy folo mianadahy ireto ao anatin’ny fotoana fohy, ireo mpaniraka azy ka efa miomana amin’izany sahady ny mponina, hoy ny sion-dresaka miely eny an-toerana. Raha tsiahivina, ireo mpitondra môtô aorian’ny amin’ny 6 ora hariva sy ireo manana môtô mipetraka ao an-tokotany no tena tafihin’ireo mpangalatra. Ho an’ireo handeha hamonjy fodiana dia torahiny ny kodiarana sy ny jiro ka raha vao mianjera dia any am-pelatanany avy hatrany.