Sosialy

Partagé sur :
• facebook

Mandray fepetra maromaro ny orinasa hisorohana ny olan’ny fahatapahan-jiro sy rano, amin’izao ankatoky ny Noely sy ny faran’ny taona izao.

Ho an’ny herinaratra dia hatao vaindohan-draharaha ny fanomezana hazavana ny arabe sy ny lalan-kely hamalifaliana ny mponina, indrindra hitandroana ny filaminana. Ampitomboina ny isan’ny ekipa mpanao asa fanamboarana maika (dépannage). Miisa enina ireo ekipa ireo amin’ny andavanandro, izay ahitana olona valo. Hampitomboina folo ny isan’izany ekipa izany amin’ny fetin’ny Noely ary 20 kosa amin’ny faran’ny taona. Ho an’ny rano dia  natao izay fomba rehetra hisorohana ny fahatapahan’ireo tobim-pamokaran-drano efatra dia i Mandroseza, Ankadivoribe, Faralaza ary Sabotsy Namehana, tamin’ny alalan’ny fanoloana  na fanamafisana ireo kojakoja toy ny paompy. Notanterahana omaly alatsinainy  izany asa rehetra  izany. Hampitomboina ihany koa ny isan’ireo ekipa mpanao asa  fanamboarana maika ary novononina ny fitaovana miaraka amin’izany toy ny fiara sy ny fitaovam-panamboarana ny simba. Ho an’ny any amin’ny faritra, ampitomboina ny famokarana herinaratra, amin’ny alalan’ny fandefasana vondrom-panely herinaratra fanampiny, miisa 18 amin’ireo faritra mena amin’ny fahatapahan-jiro. Anisan’ireny ny ao Ambilobe II,  Nosy-be II, Ambato-Boeny I, Maintirano I…Efa samy manomana ny solika ampy hihodinan’ireo tobim-pamokarana herinaratra ireo avokoa ny tompon’andraikitra any amin’ny faritra tsirairay.

Pati

Tia Tanindrazana

Samia mijoro ho an'i Gasikara.