Sosialy

Herinaratra avy amin’ny tara-masoandro Hanomboka afaka enim-bolana ny asa

Sosialy
Alatsinainy 13 Janoary 2020

Tontosa ny faran’ny herinandro teo ny fanaovan-tsonia fifanaraham-piaraha-miasa eo amin’ny orinasa JIRAMA sy ny kaompania SATAREM avy any Soisa,

izay miompana amin’ny famokarana herinaratra azo avy amin’ny masoandro. Faritra maromaro toa an’i Sakaraha, Maintirano ary Bekily no hisitraka izany ka hanomboka afaka enim-bolana ny asa. Hiavaka ireto tobim-pamokarana herinaratra haorina ireto satria hanaraka ny teknolojia avo lenta izy ireo ka tsy hampiasa solika na menaka mavesatra intsony nefa afaka hamokatra herinaratra 24/24 ora ary 7/7 andro. Tafiditra indrindra ao anatin’ny fampidinana ny saran’ny famokarana herinaratra ity fifanaraham-piaraha-miasa miaraka amin’ny SATAREM ity, hoy ny Tale Jeneralin’ny JIRAMA Vonjy Andriamanga satria 13 cents dolara ny hividianan’ny JIRAMA ny 1 kWh. Sandany izay isan’ny mora indrindra amin’ny fividianana herinaratra azo avy amin’ny masoandro. Ny filohan’ny filankevi-pitantanana Solo Andriamanampisoa ihany koa mbola nanamafy fa ezaka fanatsarana ny saran’ny famokarana herinaratra izay efa voafaritra ao anaty tondrozotra fanarenana ny orinasa ity fifanarahana ity. Manana roa taona hanarenana ny orinasa JIRAMA ny mpitantana ankehitriny, hoy hatrany ny fanazavany ary vonona hiara-kiasa amin’ireo mpiara-miombon’antoka avy eto an-toerana sy avy any ivelany. Faly izahay nanatanteraka ity fifanaovan-tsonia fifanaraham-piaraha-miasa voalohany ity satria ho fitaratr’i Afrika i Madagasikara amin’io teknolojia vaovao apetraka io, hoy ny Tale jeneralin’ny SATAREM, Jerome Friler.

Pati