Sosialy

Hain-trano teny Ankazomanga Atsimo Omby 4 kila forehitra, olona an-jatony tsy manan-kialofana

Sosialy
Sabotsy 25 Aogositra 2018

Nisehoana hain-trano goavana teny Ankazomanga Atsimo, omaly zoma atoandro tokony ho tamin’ny 12 ora.

Nipoitra avy tamina tokantrano iray ny afo, niitatra tamina toerana fiompiana biby fiompy toy ny akoho amam-borona, kisoa, omby… Omby efatra no kila forehitra vokatr’izany fa tsy tafatsangana teo amin’ny toerany raha fianakaviana an-jatony no tsy manan-kialofana. Hatramin’ny fotoana nanoratana, tsy voafehy ny afo na dia tonga ara-potoana aza ny mpamonjy voina. Noho ny fitsokan’ny rivotra mafy no voalaza fa antony. Somary manamorona tanimbary rahateo ity tanàna kely lasibatra ity ka tena nanahirana ny fifehezana ny afo. Nanampy trotraka ireo trano hazo maromaro nifanakaiky ka nampahazo vahana ny afo. Nomarihin’ireo mponina teny an-toerana fa izay azon’ny tanan’izy ireo noraisina sisa no navotany toy ny akoho, ny vorona izay miantoka ny fiveloman’izy ireo amin’ny andavanandro. Niteraka fitohanana goavana hatreny 67 ha ity hain-trano niseho tao Ankazomanga omaly antoandro ity.

Pati