Sosialy

Fiterahana ieren-doza Vehivavy 2 amin’ny 5 no manatona tobim-pahasalamana

Sosialy
Alatsinainy 29 Jolay 2019

Tafakatra 41% tamin’ny taon-dasa ny taham-pampiasana fomba fandrindram-piterahana maoderina eto amintsika, raha toa ka 5% monja izany, 25 taona lasa izay.

Anisan’ny nivoitra io antontan’isa io, nandritra ny tomban’ezaka fanao isaky ny enim-bolana, mikasika ny fiaraha-miasan’ny governemanta Malagasy sy ny Tahirin’ny firenena Mikambana momba ny Mponina (UNFPA), natao ny zoma lasa teo. Tsikaritra ihany koa fa efa nihena ny taham-pahafatesan’ny vehivavy eo am-piterahana teo anelanelan’ny taona 1992 sy 2018, na dia mbola 10 isan’andro aza. Efa nihena 28% io taham-pahafatesana io, araka ny fantatra. Mbola ambany kosa, na dia efa nahitana fiakarany kely ihany aza, ny fiterahana eny anivon’ny tobim-pahasalamana sy atrehin’ny mpiasan’ny fahasalamana. Vehivavy 2 amin’ny 5 izany, amin’izao fotoana izao. Ankoatra izay, heverina fa misy trangan’aretina mamany lava miisa 5.000 vaovao hita eto amintsika, kanefa dia 1.000 isan-taona monja no azon’ny hopitaly eto amintsika amboarina, amin’ny alalan’ny fandidiana. Tanjon’ity tomban’ezaka ity ny hahafahana manoritra an’ireo ezaka mbola tokony hotratrarina, ao anatin’ilay fifanaraham-piaraha-miasa laharana faha-7 iarahan’ny governemanta Malagasy, ny UNFPA ary ireo mpiara-miombon’antoka.

Marigny A.