Sosialy

Fiovaovan’ny toetr’andro Nahatratra 253 ireo olona efa novonjena teny an-dalambe

Sosialy
Alakamisy 31 Oktobra 2019

Betsaka ireo karazana tranga miseho eto amintsika vokatry ny fiovaovan’ny toetr’andro.

Vao tamin’ny alahady lasa teo dia olona efatra no indray maty an-drano nalain’ny sampana mpamonjy voina etsy Tsaralalana vokatry ny hafanana diso tafahoatra. Olona namonjy renirano avokoa izy ireo. Ekena, hoy ny Kapiteny Razandrabe Parfait Mamy, tompon’andraikitra voalohany ao Tsaralalana fa mila mandro matetika ny olona mba hampangatsiaka ny vatany saingy mila mitandrina kosa amin’ireo rano mandeha. Misy amin’izy ireny mantsy no misy lava-biriky izay marihina fa mahafaty haingana tokoa. Ankoatra izay dia olona manodidina 253 isa no nanaovan’izy ireo asam-pamonjena teny an-dalana nanomboka ny volana janoary lasa teo izay mbola vokatry ny hafanana diso tafahoatra ihany. Misy amin’ireny karazan’olona ireny no torana fa tsy mahazaka raha misy koa ireo narary avy hatrany. Nomarihin’ny teo anivon’ny sampana mpamonjy voina moa fa miezaka mamono afo amin’ireo doro tanety mitranga ihany koa izy ireo hahafahana miady amin’ny fiovaovan’ny toetr’andro. Efa miparitaka manerana ny faritra maro mantsy ny doro tanety ankehitriny na dia ny manodidina an’Antananarivo aza.

Pati