Sosialy

Fikambanana SoloKely Hisahana ny sosialim-bahoaka eny Ambohidratrimo

Sosialy
Alarobia 03 Jolay 2019

Ny sabotsy 29 jona 2019 teo no nampahafantarina tamin’ny fomba ofisialy teny amin’ny SLK Mandriambero ny fitsanganan’ny fikambanana FSK “Fikambanana SoloKely”

hisahana ny sosialim-bahoaka an-kasoavana sy an-karatsiana eny amin’ny distrikan’Ambohidratrimo misy ny foibeny. Tafiditra amin’izany indrindra, hoy Ramandimbisolo Berthin “Solokely” filohany, ny fanampiana an’ireo zokiolona sy ireo marefo ara-pivelomana ary ireo tanora eny an-toerana. Tamin’ny 12 jona 2019 teo no efa nahazo fankatoavana ara-panjakana ity fikambambanana ity izao nampahafantarina ofisialy izao. Efa mahatratra 200 ankehitriny ny mpikambana ao amin’ny FSK ary hezahina hapariaka manerana ny nosy izy io, araka ny voalazan’ny filohany hatrany. Hezahina ihany koa, hoy izy, ny handray anjara mavitrika amin’ireo adidy atao eto amin’ny firenena toy ny fambolen-kazo sy fanadiovana faobe. Fikambanana tsy manao politika ary tsy manavakavaka finoana sy fiaviana ary saranga ny FSK izay manana ny teny filamatra “Ny fifankatiavana no fandresena”. Tsiahiviny fa eo amin’ny sehatry ny fandraharahana sy teo amin’ny sehatry ny fanatanjahantena (filoha lefitry ny FMJ sady filohan’ny Judo club Esca) no tena nahafataran’ny maro an’Atoa Ramandimbisolo Berthin.

Ntsoavina Evariste