Fikambanana Manampy

Partagé sur :
• facebook

Latsaka lalina amin’ny fahefa-mividy ambany dia ambany ankehitriny ny vahoaka malagasy,

hoy ny fikambanana Manampy. Noho izany dia miditra amin’ny sehatry ny tena fampandrosoana ihany koa amin’izao fotoana izao ny fikambanana na «association Manampy», hoy ny filohany, Fara Ratsisetraina. Misy fizaràna miisa 2, noho izany, hoy izy, ao dia ny lafiny sosialy na «volet social» sy lafiny ekonomika sy sosialy na «volet économique – social». Hiditra lalina kokoa amin’ny fandraharahana sosialy na «entreprenariat social», noho izany, ny fikambanana. Hiady mafy ihany koa eny anivon’ireo fitondràna mahefa mba hipetrahan’izany tena hoe fiarovana ara-tsosialy ho an’ny vahoaka izany. Hisy koa ny famoronan’asa mendrika hidirana an-tsehatra ho an’ireo olona eny ifotony fa tsy hianona fotsiny amin’ireo fanomezana satria fohy ezaka kely ireny. Aleo mba mitady zavatra antonony sy lavitra ezaka ho an’ireo olona ireo. Hiditra mafonja amin’izay resaka fandraharahana ara-tsosialy izay, noho izany, manomboka izao ny fikambanana Manampy. Ho atomboka amin’ny taona 2025 sy famolavolana izany tetikasa fampandrosoam-piarahamonina izany. Ohatra amin’ilay fampiroboroboana ny fandraharahana sosialy ny fanomezana fiofanana ho an’ireo sarangan’olona tsy manana mari-pahaizana na tsy manana na inona na inona nefa afaka manao gargoty na mamorona varotra enta-madinika, eny, afaka mamorona fikambanana kely saingy miezaka foana miditra amin’ny sehatry ny ara-dalàna na «formel». Ireny fiofanana omen’ny minisiteran’ny fananan’asa sy minisitera samihafa ireny, toy ny hoe fanamboarana mofomamy na savony ireny, izany no ho tohanana ao anatin’izany, hoy hatrany ity fikambanana ity.
J. Mirija

Tia Tanindrazana

Samia mijoro ho an'i Gasikara.