Sosialy

Fianakavian’ireo namoy ny ainy teny Tsimialonjafy Tsy nanadino azy ireo ny kaominina Antananarivo Renivohitra

Sosialy
Alarobia 23 Janoary 2019

Tsy namela irery ireo traboina sy mana-manjo vokatry ny fihotsahan’ny tany teny Tsimialonjafy ny kaominina Antananarivo Renivohitra tarihin’ ny Ben’ny Tanàna Lalao Ravalomanana.

Tonga nitsapa alahelo ny fianakaviana sady nitondra ny solon-dandy ho an’ny maty izy ireo omaly sady nitondra fanampiana ihany koa. Anisan’ireny ny fotsimbary, ny menaka ary kojakojan-dakozia maro samihafa natolotra ireo traboina. Nampanantena Ramatoa Ben’ny tanàna fa hisy ny fijerena akaiky ireo traboina, indrindra fa amin’ny lafiny sosialy. Nisy ihany koa toromarika nomeny ireo tompon’andraikitra mba hakana haingana ireo ranon-tany sy vato ahiana hamono olona indray.Mbola maro mantsy ireo toerana tandindonin-doza sy ahiana mbola hihotsaka eny an-toerana. Misy anefa ireo olona tsy nandao ny trano fonenany, ka anaovan’ny tompon’andraikitra antso ny hifindran’izy ireny haingana, indrindra amin’izao fotoana mahabetsaka ny rotsak’orana eto an-drenivohitra izao.