Sosialy

Fiainana ara-pananahana Ny 37 %-n'ny Reny Malagasy no miteraka zaza tsy niriana

Sosialy
Zoma 19 Oktobra 2018

Mitombo isa hatrany isika Malagasy. Tsy maharaka izay anefa ny fiakaran'ny toekarem-pirenena, hany ka miaina anaty fahasahiranana hatrany ny isan-tokantrano.

Ankoatra ireo vehivavy efa manan-tokantrano izany hoe miaina anaty fanambadiana ara-dalàna dia betsaka ihany koa ireo zazavavy latsaky ny 15 taona no miroso amin'ny fanambadiana aloha loatra, hany ka mitaiza tsy fidiny na dia mbola tokony hianatra aza. Faritra maro no mbola ahitana izany eto Madagasikara, antony mahatonga ireo vehivavy maro maty eo am-piterahana sy ireo zaza tsy manam-piahy eny anivon'ny fiarahamonina. Raha ny fanazavan'ny minisitry ny toekarena sy ny tetipivoarana Atoa Napetoke Marcel tamin'ny mpanao gazety omaly dia ny 37 %-n'ireny olona ireny no miteraka zaza tsy niriany. Ilana fandraisan'andraikitry ny governemanta izany ka ny hany tsy maintsy hatao dia ny fanomezana fanabeazana ny olona mba tsy hiteraka maro loatra sy hampiasa ny fomba fandrindram-piterahana. Ankoatra izay dia resena lahatra ihany koa ny olona mba hanana vatana salama sy tomady hahafahany mamokatra hoenti-miady amin'ny fahantrana. Nivoitra ireo nandritra ilay tatitra nataon'ny UNFPA mikasika ny fahafahan'ny olona manapa-kevitra ny amin'ny isan'ny zaza ateraky sy ny fotoana hitondrany vohoka. Tetsy amin'ny hotel Carlton Anosy no nanatanterahana izany, natrehin'Atoa Constant Serge Bounda, solontena maharitry ny UNFPA eto amintsika. Nomarihin'ireto tompon'andraikitra ireto manokana moa fa azo tanterahina tsara eto Madagasikara ity tetikasa hahafahan'ny tsirairay misafidy ny isan'ny zaza haterany sy ny elanelan'ny fotoana hitondrana vohoka ity, indrindra fa ho an'ny vehivavy. Efa maro azo isafidianana tsara mantsy ny fomba fandrindram-piterahana eto amintsika, fihetsika iray hahafahana manatsara ny toekarem-pirenena sy ny sosialy amin'ny ankapobeny.

Pati