Sosialy

Fiainan-dRamalagasy Miha tsy zaka hatrany ny olana sosialy

Sosialy
Alakamisy 03 Desambra 2020

Miha tsy zaka hatrany ary maha sorena ny maro ankehitriny ny olana ara-tsosialy miseho lany eto amin’ny firenena.

“Tapaho ihany ny jironay, tapaho koa ny rano, apiakaro hatrany koa ny vidin-javatra, kitikitio ihany ny vodin-tsoavaly!”, hoy ny fanehoan-kevitra iray tao anaty tambazotran-tserasera tao manoloana ity fahatapahan-jiro sy rano efa tafahoatra sy vidim-piainana miakatra isan’andro ity. Vao niandoha kelikely moa ity taona ity dia efa nanambara ny mpahaitoekarena toa an-dry Serge Zafimahova fa mananontanona ny fipoahana ara-tsosialy. Ny tsikaritra sy mampametra-panontaniana nefa dia tsy hita taratra hatramin’izao ny tena vahaolana maharitra entin’ny fitondram-panjakana hamahana ireo olana ara-tsosialy maro eto amin’ny firenena rehefa tsy hampihatra ny vahaolana atolotr’ireo ivelan’ny fitondram-panjakana ihany. Kere na hoe fahoriana ara-drano sy sakafo no misy ao amin’ilay toerana kanefa dia “piscine olympique” sy kianja manara-penitra no mahamaika ny fitondrana hapetraka. Dradraina hatrany fa ireo tolotolotra mandalo tsy mahavita taona toy ny tosika fameno, kaly tsinjo, Paositra fameno no efa vahaolana entin’ny fitondrana hamahana izany kanefa efa iaraha-mahita ankehitriny hoe hatraiza no fetrany? Samy miandry fahagagana ny rehetra.

J. Mirija