Sosialy

Federasiona miaro ny zon’ny mpanjifa « Tsy mahavaha olana ny governemanta »

Sosialy
Alarobia 13 Jolay 2022

Nivoaka tamin’ny fahanginana omaly ny federasiona miaro ny zon’ny mpanjifa ahitana ireo fikambanana miisa 7 toy ny MCI, ny FIMMPAMA, ny SCAE PC, ny AVDCC…

Nambaran’izy ireo tamin’izany fa tsy rariny intsony ny fiakaran’ny vidim-piainana ankehitriny ka anisan’ireny ireo kojakoja ilaina amin’ny fiainana andavanandro. Mbola niakatra ihany koa ny saran-dalana hoy izy ireo, nanomboka omaly, hantsana lalina izay azo tsapain-tanana fa tena handetehana ny fiainam-bahoaka ka tokony ho tonga saina ilay fanjakana. Tsy mahavaha olana io governemanta mijoro io hoy hatrany izy ireo ary tsy mendrika ny hitantana intsony. Nomarihin’izy ireo ombieny ombieny fa mijaly ny vahoaka Malagasy. Izay manana ihany sisa no manana eto amintsika fa ireo sahirana milentika hatrany ny fari-piainany. Zara raha mahita hanin-kohanina indray mandeha isan’andro sisa vokatry ny hasarotan’ny fiainana ny isan-tokantrano koa hanaovan’izy ireo antso avo amin’ny fanjakana. Ho an’ireo mpiasa mandoa saran-dalana isan’andro moa dia nomarihin’izy ireo fa ankoatra ny sakafo efa ambany foitra dia hamely ihany koa ny dia an-tongotra noho ny tsy fahampian’ny ho enti-manana ka tsy hahagaga intsony raha betsaka ireo ho lasibatry ny aretina sy mety hamoy ainy tsy fidiny mihitsy.
Pati