Sosialy

Faritry ny tsena kaominalin’Ambohijatovo Tsy milamina ny tanàna amin’ny gaboraraka misy

Sosialy
Talata 26 Febroary 2019

Tsy milamina mihitsy ny tanàna amin’ny gaboraraka misy etsy amin’ny faritry ny tsena kaominaly etsy amin’ny fokontanin’i Mandrosoa-Ambohijatovo-Ambatonakanga-Antsapanimahazo noho ny gaboraraka miseho eny an-toerana.

Nanjary feno Bar fisotroan-toaka ny tanàna (tsy latsaky ny 8 izao no isany eo amin’ny elanelana 25 m monja) ka mitabataba lalandava ary mitarika tsy filaminana eny an-toerana. Lasa amin’ny 6 ora maraina dia efa ahitana fanendahana miseho any anelakela-trano rehetra any. Tsy voahaja intsony ny lalàna misy milaza fa tsy azo hivarotana toaka 150 m manodidina ny fiangonana sy sekoly fianarana eny an-toerana. Manampy trotraka an’izany ny fanorenana gaboraraka misy eny an-toerana toy ny fananganana andrin-trano anaty arabe sy ny fanaovana gabone mivantana anaty dalle ao aminy. Etsy an-kilan’izay, ao anatin’ny tsena Roland Garros etsy am-pita koa dia ahitana trano fisotroan-toaka tsy nahazoana alalana tsy latsaky ny 4 be izao ka mahatonga ny tsy filaminan’ny fiainam-bahoaka ihany koa. Tairina, araka izany, ny sain’ny tompon’andraikitry ny filaminana eto amintsika sy ry zareo ao amin’ny CUA mba hanara-maso akaiky ny zava-misy manodidina an’io tsena kaominalin’Ambohijatovo io.

Ntsoavina Evariste