Sosialy

Faritra Tsimiroro Miaina anaty fahantrana tanteraka ny mponina

Sosialy
Talata 08 Oktobra 2019

Ankoatra ireo olana ara-tsosialy, dia ratsy lalana tanteraka ny mihazo ny any Tsimiroro izay eo anelanelan’i Morondava sy Maintirano.

Iray andro mahery vao tonga any raha miala eo Tsiroanomandidy rehefa tsara ny andro ary 5 andro rehefa amin’ny fotoanan’ny orana. Tafiditra ao anatin’ny fifanarahana hifanaovana amin’ny orinasa mpitrandraka Madagascar oil kosa anefa ny fanatsarana ny fiainan’ireo mponina eo amin’ny distrika sy Faritra hanaovana fitrandrahana harena ankibon’ny tany. Nampatsiahivin’ny ministry ny harena ankibon’ny tany, Fidiniavo Ravokatra tamin’ny mponina teo Folakara, izay 3 km miala amin’ny orinasa Madagascar Oil nandritra ny fitsidihana ara-teknika nataony fa tokony hisitraka ny tombontsoa amin’ny fitrandrahana ny mponina any. Nandritra ny diany tany Tsimiroro ny zoma lasa teo dia tsy nianona fotsiny tamin’ny fitsidihana ny orinasa ny tenany fa nijery ireo tanàna akaiky ny toeram-pitrandrahana ihany koa. Hita taratra tamin’izany ary fa tsizarizary ny sakafo sy ny lafiny fitsaboana ary ny fanabeazana tany an-toerana. Sahirana ara-pivelomana ny mponina ary tena mbola olana ny fisitrahana ny fahasalamana sy ny fahampian-tsakafo ary ny fananan’asa.

Tsirinasolo