Sosialy

Faritra Atsimo Hezahina hisitraka rano fisotro madio

Sosialy
Zoma 05 Oktobra 2018

« Fampihenana ny fahavoazana ara-toekarena, vokatry ny loza sy ny tandindon-doza » no lohahevitra nentina nankalazana ny andro iraisam-pirenena ho fanalefahana ny vokatry ny loza voajanahary tamin’ity taona ity, izay natao tao Ambovombe-Androy.

Nanokatra tamin’ny fomba ofisialy ny lanonana ny praiministra Ntsay Christian omaly. Ho fanatanterahana ny fampandrosoana lovain-jafy dia «ny rano, ny fotodrafitrasa ary ny olombelona » no hevi-dehibe telo iantefan’ny Paikady ho an’ny faritra atsimon’ny Nosy manokana, ho fampihenana ny loza sy voina voajanahary, araka ny nambaran’ny lehiben’ny governemanta, ka andalam-pandrafetana ny paikady. Hohatevenina ny ezaka fametrahana « pipeline », fantsona mitondra rano satria manan-jo hisitraka izany ny any amin’ny faritra atsimo,... Manoloana ny tsy fanjarian-tsakafo, toy ny hita any Beloha sy Tsihombe sy kaominina maromaro, dia nitondra fanampiana ho an’ny mponina ny governemanta niaraka tamin’ireo mpiara-miombon’antoka : vary 115 taonina ho an’ireo distrika tena mila izany, voamaina 20 taonina hozaraina amin’ny mponina tena marefo ary siniben-drano miisa telo. Nifanindran-dalana tamin’izao fankalazana izao koa ny nanatanterahana ny hetsika ara-toekarena ity Foire « Volily Harea », andiany faharoa, izay natao indrindra hampahafantarana ny tanjaka ara-toekaren’ny Faritra Androy. Nambarany fa tokony hotrandrahintsika ny zavatra misy eto an-toerana mba hahafantaran’ny olona rehetra izany sy mba hitondra fampandrosoana marina ho an’ny faritra. Mikasika ny fifidianana, dia « fanomezana ny zo fototra ho am-pelatanan’ny vahoaka hisafidianany ny filoham-pirenena tiany hapetraka eto amin’ny firenentsika mandritra ny 5 taona ho avy », hoy izy. Ankoatr’izay, dia nentaniny hatrany ny mponina mba hitandro ny fahadiovana, indrindra amin’izao an-katoky ny fotoam-pahavaratra izao , izay mampirongatra ny aretina samihafa.

Toky R