Faritra Atsimo Andrefana

Hisitraka rafitra famatsian-drano miisa 168

Sosialy
Alatsinainy 20 Aprily 2026

Mihazakazaka ny fanatanterahana

ny tetikasa fametrahana rafitra famatsian-drano maro fampiasa na ny Système Multi-Usage (MUS) hisitrahan'ny vahoaka rano fisotro madio. Misitraka io rafitra io izao ny ao amin’ny Distrikan’Ankazoabo Sud, Faritra Atsimo Andrefana. Miisa 13 no vita ary efa azo ampiasana ka mponina manodidina ny 10.000 no misitraka izany. Fotodrafitrasa maoderina sy maharitra no natsangana, izay ahitana "forage" misy paompy mandeha amin’ny herin’ny masoandro, sinibendrano 15 m³, tambazotran-drano mivelatra, kioska “Smart Tap”, ary rafitra fanondrahana ho an’ny fambolena. Tsy rano fisotro madio ihany no azo, fa sehatra iray manohana ny fiveloman’ny mponina ihany koa, amin’ny alalan’ny zaridaina anana mirefy 500 m² izay manatsara ny sakafo sy mampitombo ny fidiram-bola. Fantatra fa 168 ireo "Système Multi-Usage" izay apetraka ao amin’ny Faritra Atsimo Andrefana. Ity tetikasa ity dia manaporofo fa ny fananganana fotodrafitrasa rano, ny fanadiovana sy ny fidiovana dia mitondra fiovana mivaingana sy maharitra eo amin’ny fiainan’ny vahoaka.
Nangonin'i Jean D.
Mponina misitraka rano avy amin'ny "Système Multi-Usage"