Sosialy

Partagé sur :
• facebook

Olona 1 348 000 no lasibatry ny kere any Atsimo, araka ny tarehimarika nivoaka

teo amin’ny fifampidinihana niarahan’ny Filoham-pirenena sy ny mpiara-miombon’antoka nahitana ny Banky Iraisam-pirenena, PNUD, Vondrona Eoropeanina, UNICEF, ary ny PAM. Ny 9 hetsy amin’ireo olona kere no efa tafiditra anary sokajy fahatelo sy fahaefatra amin’ny tsy fanjarian-tsakafo. Nandritra io fihaonana io no nilazan’ny mpitondra, fa 60 tapitrisa dolara ny famatsiam-bola angatahin’ny Fanjakana amin’ny mpamatsy vola. Hoetina manao vahaolana vonjimaika, toy ny fitondrana fanampiana ara-tsakafo sy ara-bola io. Latsaka kely amin’ny tetibola nanamboarana ny kianjan’i Mahamasina izay 77 tapitrisa dolara io tetibola tadiavina hoentina miatrika ny kere any Atsimo io. Tsy niantsoana fivoriana tamin’ny mpamatsy vola ny Fanjakana, raha nanamboatra kianja, fa tonga dia nahita, nandidy sy nanapaka tamin’ny volam-bahoaka. Rehefa kere kosa tsy maintsy miandry sy mitady mpamatsy vola. Tsy hoe ratsy ny manamboatra kianja, tsy hoe tsy ilaina, fa kosa mba mila ampifandanjana amin’izany ny zavatra hafa tokony ho laharampahamehana kokoa. Rehefa manana 77 tapitrisa dolara hananganana ny Kianja ny Fanjakana, tokony hanana tetibola hafa ihany koa hihatrehana ny zavatra hafa tsy voatery ny kere ihany, fa ny resaka fanarenana ara-toekarena izao tsy misy tokontaniny raha dinihina amin’ny laharampahamehana ao anatin’ny tetibolam-panjakana 2021.

Toky R

Tia Tanindrazana

Samia mijoro ho an'i Gasikara.