Sosialy

Fanisana mponina sy trano fonenana Ao anatin’ny fotoana farany hamoaham-bokatra

Sosialy
Alatsinainy 29 Oktobra 2018

Manoloana ny fanangonam-bokatry ny fanisana fahatelo eto Madagasikara (RGPH3) dia nanambara ny injeniera tompon’andraikitra eo anivon’ny INSTAT, Andriamitsara Tarzan, fa efa miditra amin’ny fitanàna an-tsoratra farany izy ireo.

Na dia nisy aza ny fahasarotana tany amin’ny faritra sasany noho ny olana maro samihafa tahaka ny asan-dahalo dia efa azo daholo ny vokatra tany amin’ny faritra rehetra. Amin’izao fotoana izao dia efa anatin’ny fotoana farany fikirakirana ireo vokatra ireo ahafantarana ny tena isan’ny mponina isaky ny tokantrano, ny faritra, ny distrika, ny kaominina ny foibe mpanisa INSTAT. Araka izany dia efa naman’ny vita ny fanisana ny mponina eto Madagasikara na dia nisy aza ireny olana tamin’ny fanahian’ny olona ny amin’ny fanontaniana napetraka taminy ireny satria efa azo avokoa ny vokatra rehetra. Tsiahivina fa isaky ny 10 taona amin’ny ankapobeny no atao ny fanisana ny mponina sy ny toeram-ponenan’ny firenena tsirairay ka efa tara i Madagasikara satria efa tamin’ny aogositra 1993 no nisaina farany ny mponina izany hoe efa 25 taona lasa. Ny firenena mikambana moa no tompon’antoka amin’ny fanentanana ny firenena tsirairay hanisa ny mponina ao aminy satria miainga amin’izany ny fandrafetana ny politikam-pandrosoana ara-toekarena atao sy ny fanavaozana ny antontan-kevitra mikasika ny lisi-pifidianana.

Tsirinasolo