Sosialy

Fandraisana manana fahasembanana an-tsekoly Manomboka mitombo isa

Sosialy
Sabotsy 01 Desambra 2018

Ny alatsinainy 3 desambra ho avy izao no andro iraisampirenena ho an’ireo olona manana fahasembanana.

Araka ny fampahafantarana nataon-dry zareo eo anivon’ny tetikasa Mahay izay mivoy ilay antsoina hoe Fanabeazana mampiaty tetsy amin’ny foibe FJKM Analakely omaly dia hanamarika izany ihany koa isika eto Madagasikara. Hisy, araka izany, ny antsoina hoe Herinandro ho an’ny fanabeazana mampiaty izay homarihina amin’ny alalan’ny hetsika maro any amin’ireo toerana misy ity tetikasa anaty Fiangonan’i Jesoa Kristy eto Madagasikara ity ny 3 hatramin’ny 8 desambra izao. Sekoly miisa 56 no miara-miasa amin’ny tetikasa Mahay ary hatramin’ny volana jolay teo dia efa mahatratra hatrany amin’ny 526 isa eo ireo ankizy manana fahasembanana noraisin’ireo sekoly misehatra manokana amin’izany raha toa 401 teo aloha. Maro ny ezaka tokony hatao, hoy ny mpikarakara, satria azo lazaina ho mbola sekoly vitsy eto Analamanga sy Vakinankaratra ary Moramanga no voasarika hatreto. 13 isa ny eto Analamanga, 21 ny ao Vakinankaratra ary ny ambiny moa izany ao Moramanga. Hamaranana ny hetsika ao amin’ny Lycée Moramanga moa ny 8 desambra izao ny hazakazaka fohy hifaninanan’ireo manana fahasembanana izay hantsoina hoe « Fo miara-mitempo ho an’ny fanabeazana mampiaty ». Araka ny teny hoe « Mampiaty » dia ny hampiroborobo fanabeazana tsy manilika an’iza na iza no tanjona.

J. Mirija