Sosialy

Fandefasana mpiasa an-tsokosoko any ivelany Betsaka ireo efa nampidirina am-ponja

Sosialy
Talata 26 Martsa 2019

Tsy mipetra-potsiny intsony ny polisim-pirenena taorian’ny nisian’ireo olona maromaro tratra nandefa mpiasa Malagasy an-tsokosoko tany ivelany, indrindra fa tany amin’ireo tany arabo.

Tafiditra ao anatin’izany ireo vehivavy izay tambatambazana karama 600.000 Ar isam-bolana ary hahazoan’ireo mpanondrana 100.000 Ar isan’olona raha kely hanamboarana ny antontan-taratasin’izy ireo… Raha araka ny fanadihadiana natao teo anivon’ny polisim-pirenena dia betsaka ireo olona efa nampidirina am-ponja ka nisy mihitsy ireo nalefa eny Tsiafahy sy Antanimora. Midina ifotony manara-maso mihitsy izy ireo. Anisan’ny hiasan’izy ireo ny fanaraha-maso ireo olona manamboatra pasipaoro ka raha vantany vao mikasa ny handeha any amin’ireo firenena arabo toa an’i Koweit, Liban… ny vehivavy iray dia efa hanokafan’izy ireo fanadihadiana. Tsy latsa-danja amin’izany ny fijerena ireo toerana ahiana misy ny “agence de placement” miorina any an’elakelatrano ireny izay marihina fa efa tsy manao peta-drindrina intsony ny ankamaroany ankehitriny. Avy hatrany dia samborina izay tratra raha ny fantatra hanaovana fanadihadiana ary hatolotra ny fitsarana avy hatrany. Tsiahivina moa fa ny 24 febroary lasa teo no niainga teto amintsika ireo delegasiona avy amin’ny fanjakana hampody ireo mpiasa Malagasy mijaly any Koweit.

Pati