Fanasan-damba eny amin’ny tetezan’i Bekiraro

Mampiady ny mpanjifa ireo tomponandraikitra

Sosialy
Alarobia 04 Septambra 2024

Maro ireo olona mampiasa ny «bassin» na fanasan-damba eny amin'ny tetezan'i Bekiraro

izay mitaraina fa anjakazakan'ireo mpikarama ny «Bassin» iombonana, hoy ny fampitam-baovao voaray omaly. Araka ny lamina napetraka hatrizay dia «Bac» na toerana iray ny an'olona iray ary tsy azo atao ny mamandrika toerana mialoha fa izay tonga aloha no mampiasa izany, hoy ny fanazavana. Tsy izay nefa no misy amin'izao fotoana izao fa ireo mpikarama rehefa tonga dia manongotra ireo olona efa manasa lamba eo ka lasa ady no hiafarany. Tsy vao izao ity tranga ity fa efa ela no nisian'ny disadisa manoloana izany. Ireo tomponandraikitra moa dia mitango vola fotsiny fa tsy misy fanaraha-maso an'ireo mpanjifa, hoy ireo olona mampiasa ny «bassin» eny an-toerana. Mampiady ny mpanjifa, araka izany, ireo tomponandraikitra, raha ny fampitam-baovao sy fitarainana hatrany.
J. Mirija