Sosialy

Fanampiana ny Kere Nivondrona anaty hetsika Tsioka Atimo ireo mpanakanto

Sosialy
Zoma 13 Novambra 2020

Tanora maromaro, mpikarakara hetsika ara-javakanto maromaro no nivondrona ao anatin’ny hetsika antsoina hoe « Tsioka Atimo » ahafahana manampy ireo mpiray tanindrazana Kere any atsimon’ny nosy.

Araka ny fanazavan’izy ireo tetsy amin’ny Teinturerie Ampasanimalo omaly dia fotodrafitrasa miisa 3 no nivondrona ho iray mba hahafahana mifanohana amin’izay havantsika any atsimo izay. Mpanakanto maromaro toy ny mpanao mozika dia ry Jao mpiarakandro, Jah roots, Masimanjaka, Rapo atlas sy mpandihy toy ny Kaompania Rary ary ny mpiangaly akanjo toa an-dry Dis local, Hazavana initiative ary Velohary. Ny 14 sy 15 novambra izao moa no hanatontosana ny hetsika eny amin’ity toerana ity sy eny amin’ny La ligalaise Ampandrana. Hisy varotra fampirantiana kanto maro mandritry ny hetsika ary miampy varotra fampirantiana fanomezan-tsiro sakafo sy dite ary voankazo miahy sy zava-mahasarika ny sokajin-taona rehetra. Tanjona ny hahazo izay voatsirambin’ny tanan’ireo afaka manome fanampiana ny havantsika, hoy ny fanazavana, sy hanehoana afaka miray hina amin’ny rehetra ny mpanakanto. Raisina an-tanan-droa avokoa, hoy ny tomponandraikitra, Tanjona Rabearivony, na sakafo ilaina an-davanandro na lelavola.

J. Mirija