Sosialy

Partagé sur :
• facebook

Vary an-taoniny maro, ronono 400 000, rano fisotro 1hetsy, savony,…. ankoatra

ny fanampiarana ara-bola nomen’ireo mpiara-dia sy avy aminy no voaagona tamin’ny tsingerin-taona nahaterahan’ny Filoha teo aloha Marc Ravalomanana ny sabotsy teo, ary izy no hanatitra izany any Atsimo. “Haterintsika mivantana ny fanampiana, tsy nangataka tamin’ny Fanjakana aho hoe omeo vola aho hateriko any, tsy nangataka tamin’ny Minisiteran’ny mponina aho,… fa ahy, fitiavako, tsy ho marihiko izany fankalazana izany satria misy vahoaka mpiray tanindrazana any mahantra. Tena handeha aho fa asakasakareo na ahoana na ahoana fa mijaly ireo mpiray tanindrazana amintsika ireo. Tsy maintsy tonga any amin’izay hanaterana azy, ary aza manahy fa tsy hisy banga na ariary aza. Vitantsika ny mampihinana ireo olona mampalahelo ireo”, hoy ny Filoha teo aloha. Asa indray izay mety ho endrika sakantsakana satria tsy hahafaly ny Fitondrana mihitsy ny zavatra ataon’I Marc Ravalomanana, izay antondraharaha iray ho an’ny mpitondra ny manenjika sy manao andrimaso azy.

MBOLA HO MAFY NY AMIN’NY TAONA HO AVY

 Mikasika ny fahasahiranan’ny firenena amin’ny ankapobeny, dia nahitsy I Marc Ravalomanana naneho fa diso ny paikady entin’ny Fanjakana. Tsy izao ihany isika no ho sahirana, fa amin’io taona ho avy io, hoy izy. Anton’izany ny tsy fiasan’ny orinasa nandritra ny valo volana, tsy fihodinan’ny sehatra tsy miankina, fikatonan’ny orinasa tamin’ity taona 2020 izay izao vao misy fiantraikany. Tsy nisy anefa ny paikady mazava hanarenana sy hanavotana ny toekarena. Na hitaky hetra etsy sy eroa aza tsy hampiova zavatra firy, ka somary nitondrany vazivazy hoe andraso eo Paoly.

Toky R

Tia Tanindrazana

Samia mijoro ho an'i Gasikara.