Sosialy

Fambolen-kazo faobe Tsy maintsy atao andro alahady ve ?

Sosialy
Alatsinainy 13 Janoary 2020

Andro alahady ilay 19 janoary, hanombohana ofisialy ny taom-pambolen-kazo hatao eny Tampoketsa.

Tsy fantatra raha tsy maintsy manatrika izany ny rehetra na hanaja ny fahafahana mivavaka ny fitondram-panjakana. Ny mpiasam-panjakana, indrindra ireo mpiasa ECD sy EFA aloha, dia hatahotra raha tsy handeha, sao hahazo fangataham-panazavana (demande d'explication) miafara amin'ny tsy fanavaozana fifanarahana arak'asa, izay mitovy amin'ny fandroahana ihany. Ho an'ny FJKM manokana, ohatra, dia fotoan-dehibe ny alahady fahatelon'ny volana janoary satria fotoana fiarahabana ny filohan'ny FJKM mianakavy. Amin'ity taona ity dia eny amin'ny coliseum Antsonjombe no hifampitaona ny mpino kristianina avy amin' ny FJKM ny alahady 19 janoary. Dia ahoana izany raha mpino FJKM izay mpiasan'ny minisitera ? Na koa katolika na avy amin'ny antokom-pivavahana hafa mitandrina ny andro alahady ? Tsy mety kokoa ve raha atao andro hafa io fambolen-kazo io. Ohatra, alarobia, dia amin'izay afa-po na ny FFKM na ny advantista na ny silamo na ny apokalipsy sy ny maro hafa. Fantatra fa feno herintaona amin'ny 19 janoary izao ny fianianan'ny filoha Rajoelina ka mety ho manamarika azy manokana io daty io. Sa tsy tokony hipetraka ho olana ve ny andro alahady satria firenena laika i Madagasikara ?

Marigny A.