Sosialy

Famahana ny olan’ny fanabeazana Hiadian-kevitra ao anatin’ny filankevitry ny minisitra

Sosialy
Talata 03 Martsa 2020

Nitohy omaly alatsinainy 2 martsa ny dinika nifanaovan’ny fiadidian’ny primatiora tarihin’ny praiminisitra lehiben’ny

governemanta Ntsay Christian sy ny delegasionina avy amin’ny minisiteran’ny fanabeazam-pirenena sy ny fampianarana teknika ary fanofanana arak’asa (MENETP) notarihin’ny minisitra Andriamanana Josoa Rijasoa. Nankatoavin’ny praiminisitra nandritra io ny volavolam-panitsiana ny didim-panjakana vitsivitsy hanatanterahana ny fifanarahana teo amin’ny fanjakana Malagasy sy ireo sendikalista ny 24 jolay 2018. Ampidirina amin’ny fampitam-baovao am-bava amin’ny filankevitry ny governemanta rahampitso alarobia, ka hisian’ny fandaniana sy fanaovan-tsonia izany eo anivon’ny filankevitry ny minisitra. Nambara fa voajery ao anatin’ireo didim-panjakana ireo avokoa ireo sokajin’olona ao anatin’ny MENETP: Mpampianatra, mpiasa birao, mpiandraiki-draharaha samihafa eo anivon’ny toeram-pianarana sy ny fanofanana manerana ny Nosy. Miantso ny rehetra ho tony sy hanohy ny asa fampianarana am-pilaminana ny minisitera.

Toky R