Sosialy

Famadihana ny mangahazo ho afarinina Tonga ao Isaka ny milina, hiodina tsy ho ela

Sosialy
Alakamisy 05 Mey 2022

Efa tonga any Isaka Ambohimahasoa ny fitaovana hamokarana lafarinina avy amin’ny mangahazo, araka ny fampitam-baovaon’ny Minisiteran’ny Fampiroboroboana ny Indostria sy ny varotra ary ny fanjifana omaly.

Vokatra mangahazo avy amin’ny kaominina Isaka, Vohitrarivo, Befeta ary Ikalalao samy ao anatin’ny distrikan’Ambohimahasoa no haodina mba hahazoana lafarinina avy amin’ny mangahazo. Efa tonga any Isaka noho izany ireo milina hotantanin’ny Kaoperativa Kolo Aina. Nidina nijery sy namantatra ny toerana ametrahana ity indostria ity ny Fitaleavam-paritry ny Minisitera na ny DRICC Matsiatra Ambony ny fiandohan’ny herinandro teo, ary afaka 15 andro dia tokony ho vita ny fanatsarana ny trano ametrahana ny fitaovana, hoy ny tompon’andraikitra. Ny volana febroary teo no efa niresahana ity tetikasa ity vokatry ny fidinana ifotony nataon’ny minisitra Edgard Razafindravahy tany amin’ny ilany atsimo, ao anatin’ny fanatanterahana ny velirano faha-7 dia ny fampiroboroboana ny indostria.
Toky R