Sosialy

Fahazoana herinaratra any an-tokantrano Vao ny 56 %-n’ny Malagasy no misitraka izany

Sosialy
Alarobia 28 Novambra 2018

Vao ny 56 % -n’ny Malagasy no misitraka herinaratra any an-tokantrano raha betsaka ankehitriny.

Ny 6 % amin’ireo no any amin’ny tontolo ambanivohitra raha eto an-drenivohitra avokoa ny 50 %, hoy Rasoloelison Lantoniaina, minisitry ny angovo. Efa nahitana fiakarany io salan’isa io, hoy izy, omaly. 25 % ireo mponina nisitraka izany tamin’ny taona 2013 izay nomarihiny fa tsy maintsy mbola hanaovana ezaka ihany hahatrarana ilay tanjon’ny fampandrosoana maharitra na ODD ato anatin’ny 12 taona. Nisy omaly ny atrikasa goavana nentin’izy ireo nanehoana sy nampahafantarana ilay drafitra sy paikady hoenti-manorina fotodrafitrasa miady amin’ny tsy fahampian’ny herinaratra eto amintsika. Raha tamin’ny alalan’ny solika mavesatra sy gazoala hatrany teo aloha no nahafantsika nisitraka izany dia hampidirina amin’izay manomboka izao ny fitrandrahana herinaratra amin’ny alalan’ny angovo avo havaozina sy ny herin’ny masoandro mba ho tombontsoan’ny rehetra. Efa vita ny fanadihadiana mahakasika izany izay hijanona ho fananantsika Malagasy. Tsy hijanona ho boky fotsiny izany, hoy ity minisitry ny angovo ity fa miampy rindram-baiko (logiciel) ihany koa izay notsindriany manokana fa hamoahana ilay master plan indray atsy ho atsy. Tanjona amin’izao famoahana drafitra sy paikady izao ny hahafahana manao tetikasa hahazoam-bokatra avy hatrany ka hisy fiantraikany mivantana amin’ny fiainan’ny mponina andavanandro. Mikasika ilay resaka mandeha ny amin’ny mety hanafoanan’ny fanjakana ny famatsiam-bola omena an’ny JIRAMA dia nambaran’ny minisitra Rasoloelison Lantoniaina fa tsy maintsy hiakatra ny vidin-jiro alain’ny mponina raha toa ka tanteraka tokoa izany.

Pati