Sosialy

Fahapahan-jiro matetika Fitarainana 800 isan’andro no voarain’ny JIRAMA

Sosialy
Alakamisy 14 Mey 2020

Mahatratra 800 isan’andro ny fitarainana voarain’ny orinasa JIRAMA mikasika ny fahapatahan’ny jiro sy rano eto an-drenivohitra sy ny manodidina isan’andro. Manoloana izany dia nitondrana fanazavana misimisy kokoa Atoa

Ralaivaoalandreo Eloi Alphonse anisan’ireo tompon’andraikitra ao an-toerana. Nambarany tamin’izany fa ankoatra ny fahanteran’ny fitaovana izay mitarika fahasimbana dia misy ihany koa ny fahatapahana noho ny antony hafa. Isan’izany ny halatra fitaovana, ny fisian’ireo hazo manakaiky ny tambazotra izay mikasika na mianjera amin’ny zotra MT na BT, ny filalaovan’ny ankizy papango vita amin’ny kitapo plastika sy kofehy izay misaringotra amin’ny tarobian-jiro na bakoly ka mitarika « court circuit » indrindra amin’ny tambazotra mitondra herinaratra mavesatra. Ity farany dia mety hitera-doza toy ny fahamaizan’ny zaza mihitsy. Ilaina arak’izany ny fanaraha-maso ataon’ny Ray aman-dreny sy ny tompon’andraikitra isam-pokontany amin’ny filalaovan’ny ankizy ity kilalao iray ity indrindra amin’izao fotoana maha be rivotra izao. Eo ihany koa ny fampiasana fitaovana mampiasa herinaratra mavesatra toy ny friteuse mandritra ny ora be mpampiasa izany hoe manomboka 6 ora hariva ka hatramin’ny 9 ora alina. Miantso ny rehetra mba hahay hifanohana araka izany ny orinasa JIRAMA.

Nangonin’ i Pati