Sosialy

Fahantrana sy gaboraraka Tany tsy tan-dalàna no fositra

Sosialy
Talata 06 Oktobra 2020

Ny fototra iorenan’ny tany tan-dalàna dia ny fanjakana tan-dalàna. Ny fipetrahan’ny fitoniana sy filaminan-tsaina ho an’ny rehetra no fototra hahafahana miroso milamina amin’ny tena fampandrosoana.

Anisan’ny namotika antsika sy nahatonga antsika ho anisan’ireo firenena mahantra indrindra maneran-tany ny tsy fisian’ izay fanjakana tan-dalàna. Tsy mahagaga raha manjaka eto amin’ny firenena ny gaboraraka satria tsy voahaja araka ny tokony ho izy ny lalàna velona, manomboka amin’ny lalàna kely indrindra, hatramin’ny lalàmpanorenana. Miriaria eny amin`ny fiarahamonina ireo tsy maty manota. Mitombo isa hatrany ireo mihevi-tena ho ambonin’ny lalàna. Kanefa izay manao ratsy dia tokony ho tsaraina sy ho faizina araka izay sazy sahaza azy. Noho izay gaboraraka sy tsy fanajàna ny lalàna mifehy ny firenena sy ny fiarahamonina izay no mahatonga an`i Madagasikara tsy hilamina. Zatra niaina tao anatin’ny gaboraraka mantsy ny Malagasy tao anatin’ny taona maro ka mbola sarotra no hirosoana amin’izany fanjakana tan-dalàna izany. Inona moa no atao hoe “fanjakana tan-dalàna” fa ny tokony hanajàn’ny olon-drehetra ny lalàna velona eto amin’ny firenena, ary ny fanasaziana ireo rehetra mandika lalàna, na olon-tsotra na mpitondra fanjakana.

Marigny A.