Sosialy

Estellah tsy hita popoka Nampijaliana avy eo nesorina ny ainy…

Sosialy
Zoma 27 Desambra 2019

Tamin’ny talata 24 desambra lasa teo no very tsy hita rehefa nilalao teo an-tokotaniny, teny Anjanadrambony Itaosy, i Manana Estellah, zazavavikely manodidina ny 5 na 6 taona eo.

Tsy hita io zaza io hatramin’ny omaly saingy niparitaka tamin’ny tambajotran-tserasera facebook kosa fa misy fatin-jazakely hita teny Faliarivo Ankaditany, izay nisy itovizana betsaka taminy. Rehefa natao tokoa ny fanadihadiana dia tena i Estellah kely ilay very io namoy ny ainy io. Tao anaty rano teny Malaza Ampitatafika izy no hita raha ny loharanom-baovao. Nifatotra ny tànany ary efa nisy namono tao anaty lamba ny nofo mangatsiakany. Nokendaina tamin’ny silipony ihany izy ary azo heverina fa natsipy tao anaty rano rehefa maty, raha ny fahitana azy. Tsy nisy fanolanana anefa raha araka ny fanazavan’ny mpitsabo nijirika ny razana. Famonoana tsotr’izao fotsiny izany no tena nitranga. Torana nifamonjena avy hatrany moa ny reniny nandritra ny fotoana nahitana ny razana, hoy hatrany ny vaovao. Andrasana ny fanadihadiana ary irariana mba ho sarona izay tsivalahara tao ambadiky ny famonoana zaza tsy manan-tsiny tahaka izao. Hoentina amintsika eto ihany ny tohin’ity fahaverezan-jaza hita faty teny Itaosy ity.

Pati