Depiote Todisoa Andriampandry

Tsy nanadino ireo zokiolona sy ankizy kamboty

Sosialy
Talata 26 Desambra 2023

Tahaka ny fanaony isan-taona, tsy nanadino ireo kilonga madinika sy ireo zokiolona

sahirana avy amin’ny fokontany maromaro ao anatin’ny Boriborintany faha-6 iadidiany ny Depiote Todisoa Andriampampandry. Noho ny fankalazana ny krismasy, nisy ny fanolorana fanampiana nataony teny Ambohimanarina ny sabotsy lasa teo.
Noho ny vaninandro fety, dia nisitraka vary, hena, menaka, paty, savony, sira, siramamy,… ireo zokiolona sahirana ary vatomamy sy mofomamy kosa ho an’ireo ankizy maro be sahirana sy kamboty. Nisy ihany koa ny fiaraha-misakafo masaka tamin’izany niarahana tamin’ny Masera Benedicte sy ireo fikambanana maro samihafa miahy ireo sahirana. Niara-nifety sy nikorana nifampizara hafaliana ny rehetra nanehoana ny hafaliana sy firaisam-po noho ny hasaramanitra. Tsy adinon’ny depiote Todisoa Andriamampandry ny nampahatsiahy sy naneho hatrany, fa «Tsy misy manana ny ampy fa sambatra izay mifanampy ». Nandritra io ihany koa moa nirariany krismasy sambatra ho an’ny vahoaka Malagasy rehetra, ary nirariany ny rehetra hahatratra ny asaramanitra ka samy hanao faran’ny taona feno fifaliana eo ambany fiadanan’ny Tompo.
Toky R