Sosialy

CUA sy ONG Positive Planète Hanatsara ny fari-piainan’ireo mpaka fako miisa 1.000

Sosialy
Alakamisy 20 Septambra 2018

Mpaka fako miisa 1.000 eto amin’ny tanànan’Antananarivo no hisitraka ny fiaraha-miasa eo amin’ny kaominina Antananarivo Renivohitra sy ny ONG Positive Planète International.

Tontosa omaly maraina teny Analakely ny sonia fifanekem-piaraha-miasa eo amin’ny roa tonta, notarihin’ny Ben’ny tanànan’Antananarivo Lalao Ravalomanana an-daniny ary ny talem-paritry ny Positive Planète International Rtoa Agnès Hiere an-kilany. Mitentina 500. 000 Euros ny tentim-bidin’ny tetikasa hotanterahina. Famatsiam-bola avy amin’ny AFD (Agence Française de Développement), ny Région Ile de France ary ny Fondation Suez. Hitantana ny tetikasa kosa ny Kaominina Antananarivo Renivohitra (CUA) sy ny ONG Positive Planète International. Tanjona ny hampiakatra ny fari-piainan’ireo mpaka fako miisa 1.000 ireo, amin’ny alalan’ny fanodinana ny fako voaangona hisian’ny fidiram-bola hafa ary hanomezana azy ireo fiahiana ara-tsosialy koa, hoy ny tale misahana ny raharaha sosialy ao anivon’ny Kaominina Antananarivo Renivohitra ny Dokotera Prisca Andriantseheno. Efa nanomboka ary miasa amin’ny fokontany miisa 30 ny tetikasa, misandrahaka manerana an’ireo Boriborintany enina eto an-drenivohitra. Haharitra 2 taona ny fifanaraham-piaraha-miasan’ny roa tonta ho fampakarana ny fari-piainan’ireo mpaka fako eto Antananarivo Renivohitra.

Pati