Sosialy

Collier Alefa Barea, Bapampa, Fehin-tanana Mahalany roa baoritra isan’andro ny mpivarotra iray

Sosialy
Alarobia 10 Jolay 2019

Taorian’ny fandresena miezinezina azon’ny ekipam-pirenena Barean’i Madagasikara ny alahady lasa teo, ankoatra ny mpivarotra ny polon’ny Barea,

dia nitombo ihany koa ireo mpivarotra haingon-tanana sy fehin-tanana ary “collier” misy soratra hoe Alefa Barea. Mandeha ny tsena, tsara ny tsena, satria ifanotofan’ny renim-pianakaviana, ny tovovavy, ireo mpitia baolina kitra, ireo karazana haingo misy soratra Barea. Ho an’ity ramatoa mpivarotra azy ity etsy amin’ny Pavillon Analakely, dia nambarany fa mpivarotra hani-masaka no asan’izy mivady. Ilay rangahy sy ny zanany no mivarotra io sakafo masaka io, fa izy kosa nivarotra ireo karazana haingo misy Barea. Hatramin’ny nanombohan’ny Can, dia zara raha nandeha ny tsena, fa rehefa tafita ary tafiakatra ny Barea dia nandeha ny tsenany ary nampiany avo roa heny aza ny entana namidy. 2000 ariary ny collier iray, 5000 ariary ny Bapampa ary 2500 ariary ny fehin-tanana izay samy misy ny sary sy soratra Alefa Barea avokoa. Nambaran’ity mpivarotra fa mahalany roa baoritra isan’andro izy amin’ny fehin-tanana sy “collier”. Ny Bapampa kosa zara raha mandeha noho ny vidiny sy ny masonkarenany. Noho ny fanohanan’ny Malagasy ny ekipa Malagasy no voalazany fa mampandeha ny tsenany.

Sitraka r.