Sosialy

CMH – Antananarivo renivohitra 451 ireo fandikan-dalàna tao anatin’ny iray volana

Sosialy
Zoma 23 Oktobra 2020

Nitohy tetsy amin`ny lapan`ny tanàna Analakely ny fampiofanana izay nataon` ny CUA mikasika ny fampahafantarana sy fampatsiahivina ireo fehezam-pitsipika monisipaly misahana ny fikolokolom-pahasalamana (CMH) izay andiany fahaefatra.

Nandray anjara tamin` izany ny mpanolotsaina monisipaly sy ny solontenan` ny mpanao gazety ary ny solontena avy amin`ireo ministera. Tanjona dia ny fampahafantarana ny CMH sy ny lalàna mialohan`ny fampiharana ny paikady. Eo ihany koa ny fisorohana ny kolikoly ao anatin`ny fampiharana izany. Teo koa ny fanamafisana ny fahaiza manao sy ny fifampizarana traikefa. Voaresaka ihany koa ny fahafantarana ireo andinindiny mahakasika amin`ny ady amin`ny Covid 19. Raha ny tatitra fohy nataon` ny teo anivon` ny CUA dia maro ireo tranga fandikan-dalàna tratra mahakasika ny CMH raha ny 24 aogositra hatramin` ny 17 septambra teo no lazaina. Miisa 137 ny tranga fanaovana maloto an-kalamanjana. Miisa 204 ny fandikan dalàna amin`ny fanasan-damba amin`ny toeram-bahoaka. 42 ireo nanasa fiara amin`ny toeram-bahoaka. Fampidirana am-balan-tsazy sy fanakatonana “bouffe mobile” dia miisa 02. Ny fanesorana kioska dia miisa 66. Mbola ao anatin` ny fampianarana ny CMH aloha fa tsy mbola nihatra ny sazy. Marihana fa ny volana septambra teo no efa nanomboka ity fampiofanana ity ary hifarana ny 13 novambra izao.

Marigny A.