Sosialy

Partagé sur :
• facebook

Notokanana tamin’ny fomba ofisialy omaly ireo fitaovana manazava ny tanàna na « Plaque solaire », fitaovana manome jiro avy amin’ny masoandro,

 tetikasan’ny « Association EZAKA », tao amin’ny « Cité » Andranoambo fokontany Andohatapenaka III Boriborintany voalohany kaominina Antananarivo Renivohitra (CUA). Niisa 13 teo ireo « Association » teny anivon’ireo fokontany izay niasan’ny CDA (Centre de Developpement d’Andohatapenaka) no tonga nisoratra anarana. Ny 11 tamin’izy ireo ihany no nanolotra ny tetikasany ary ny 3 kosa no nahazo loka. Ny Association EZAKA no nandrombaka ny laharana faha-2 tamin’ity fifaninanana ity, ka izay indrindra no nahazoany famatsiam-bola nitentina 5 tapitrisa Ariary mba ho fanatanterahana ny tetikasan’izy ireo dia ny fanazavana ny tanànany amin’ny alalan’ny jiro avy amin’ny masoandro. Tsara ny manamarika fa niaina tao anaty haizina tanteraka ity « Cité » ity tao anatin’ny 10 taona niorenany, zary lasa nanjakan’ny tsy fandriampahalemana ka nahatonga ny fikambanana EZAKA nanatontosa izao tetikasa izao niaraka tamin’ny CUA. Araka ny nambaran’ireo mponina teny an-toerana dia faly izy ireo satria dia efa volana maromaro no nisitrahan’ireto farany ny fahazavana. Ny CDA sy ny kaominina Antananarivo Renivohitra no namolavola ny tetikasa ary ny fampiroboroboana ny fitondrana tsara tantana eny ifotony amin’ny alalan’ny fampandraisana andraikitra ny tsirairay no antony. Tamin’ity indray nitoraka ity dia ny elakela-trano no nanombohana ny tetikasa tamin’ny alalan’ny fametrahana “projecteurs” 27 manodidina ny tanàna. Mbola ho avy ny fahazavana isaky ny tokantrano tsirairay.

Toky R

Tia Tanindrazana

Samia mijoro ho an'i Gasikara.