Sosialy

Boriborintany faha-2 Afa-pahasahiranana ireo mpanasa lamba

Sosialy
Zoma 14 Desambra 2018

Afa-pahasahiranana ireo mpanasa lamba ao amin’ny fokontanin’i Manakambahiny sy Ambatomaro ary Ankerakely sy Ambohipotsy Amparihy amin’ny boriborintany faha-2 ankehitriny fa natolotry ny depiote Rastany avy amin’ny antoko TIM sy Atoa Sedera

mpanolotsain’ny kaominina “CM” ao amin’ity boriborintany ity, izay iraka manokan’ny kandida Marc Ravalomanana n°25 omaly alakamisy 13 desambra 2018 tamin’izy ireo, ny toeram-panasan-damba sy fidiovana “bassin lavoir”nohavaozina tao amin’ireo toerana ireo. Tena nampijaly ireo mpampiasa azy tokoa teo alohoa teo ireo toeram-panasan-damba ireo ka velom-pisaorana ny kandida Marc Ravalomanana n°25 ireo mponina tamin’ny nanirahany ireo mpiara-miasa aminy ireto nanolotra izao zava-bita ho an’ny mponina izao. Hita amin’izao, hoy ireto mpanasa lamba ireto fa mitsinjo ny madinika tokoa i Dada ka izay tena mahasoa no omeny anay. Tsy nofinofy fa zavatra azo tsapain-tanana ny programan’asan’ny kandida n°25, hoy ny depiote Rastany raha nandray fitenenana izy, asa miantraika amin’ny vahoaka mivantana no imasoany fa tsy manao fampanantenana poakaty izany izy. Ny CM Sedera indray dia nanamafy fa tokana ny vahaolana, tsy misy afa tsy i Dada ihany ka aza mety hofitahina amin’ny mena miraviravy ianareo. Ankoatra ny tentim-bidin’ny fanamboarana natao izay nitentina 1400 000 ariary dia nanolotra savony sy tablier ho an'ireo mpanasa lamba ihany koa ireto iraky ny kandida n°25 ireto.

Ntsoavina Evariste