Sosialy

Bemasoandro Itaosy Olona 130 voapoizina ara-tsakafo

Sosialy
Talata 22 Oktobra 2019

Tafakatra 130 ankehitriny ireo olona lasibatra vokatry ny fahapoizinana ara-tsakafo nitranga teny Bemasoandro Itaosy ny 13 oktobra lasa teo.

Maromaro amin’ireo no ankizy ary betsaka ihany koa ny olon-dehibe. Nanomboka tamin’io alahady io no narary ireo olona teny Bemasoandro Itaosy ka hatramin’ny talata 15 oktobra, hoy ny lehiben’ny borigadin’ny zandarimariam-pirenena eny Ambohidrapeto Itaosy Atoa Raniriarison Claude Olivier. Nisy tamin’ireo no nanatona dokotera tsy miankina. Vokatry ny fihinanana “ovy nendasina”sy“nem” no nahatonga ny loza niampy“compose”. Nihamafy ny toe-draharaha ka nalain’ny mpitandro ny filaminana tao an-tokantranony ilay renim-pianakaviana mpivarotra tamin’ny herinandro teo, ilay voalaza fa tena tompon’ny tsena. Notanana vonjimaika ity farany noho izany ary niakatra fitsarana tamin’ny sabotsy teo. Rehefa nanadihady ny zava-nisy anefa ireo mpitsara nandray an-tanana ny raharaha dia namerina ity renim-pianakaviana ity indray teo anivon’ny mpitandro ny filaminana mandra-piandry ny valin’ny“analyse”avy amin’ny médecin inspecteur eny anivon’ny hopitaly Itaosy izay nandray an-tanana ireo olona narary marobe. Mbola ao amin’ity borigadin’ny zandarimariam-pirenena ao Ambohidrapeto Itaosy, araka izany, ilay renim-pianakaviana mpivarotra. Tsiahivina fa efa nakaton’ny kaominina Bemasoandro ilay tsena noho ilay tompony voalaza fa tsy nahazo alalana avy amin’ny kaominina sady tsy mandoa pantanty ihany koa. Raha araka ny fanazavana azo hatrany dia toa nisy olona iray maty, ity farany izay voalaza fa tsy nanatona tobim-pitsaboana. Andrasana izay mety ho tohin’ny raharaha.