Sosialy

Partagé sur :
• facebook

Amin’izao fihibohana an-trano izao, izay niampy 15 andro indray dia nivondrona ao anatin’ny “Comité 5”, ireo mpandraharaha karana mipetraka ao amin’ny faritra Boeny,

 ka nanolotra vary 300 gony na 15 taonina, savony 375 baoritra hanampiana ireo olona sahirana sy marefo ara-pivelomana ary ireo zokiolona. Ny fikambanana Gasy Karana ao Boeny no nanatanteraka izany ka ny sabotsy lasa teo no nanoloran’izy ireo ny fanampiana. Ny Ben’ny tanànan’i Mahajanga sy ny lehiben’ny faritra mpisolo-toerana no nandray an-tanana izany fanampiana izany. Nilaza ny mpitondra tenin’ny fikambanana Gasy karana, Atoa Ganivalah, fa efa nandritry ny 5 taona no nizara sy nanome sakafo ireo olona isaky ny fokontany ny fikambanana ary nandritra izany no nanaovan’izy ireo ny fanohanana sy fanampiana ara-tsakafo, fitafiana, hena, sns, ho an’ireo marefo ara-pivelomana. Voalazan’ity mpitondra teny ity, fa olona 100 isaky ny fokontany no mahazo ny fanampiana omen’izy ireo hatramin’izay. Miditra amin’ny andro ririnina isika, ka eo ihany koa ny fanomezana azy ireo lamba sy fitafiana mafana hoy ny tenany. Amin’izao fisian’ny valan’aretina coronavirus eto amintsika izao, dia manaraka ny toromarika rehetra omen’ny fanjakana ny fikambanana ary manohy hatrany ny fanampiana ara-tsakafo izay ataon’ny “Association Gasy Karana”. Araka ny fantatra dia mbola “Zero Cas” i Mahajanga amin’izao ary tsy misy ny soritr’aretina any Boeny, hoy Ganivalah.

Tsirinasolo

Tia Tanindrazana

Samia mijoro ho an'i Gasikara.